मुलगी झाली डॉक्टर, मुलाला वकील करण्याचे स्वप्न…पण वडिलांच्या आणि मुलाच्या भेटीचा अखेरचा फोटो समोर

शिरूर : समृद्धी महामार्गावर झालेल्या अपघातात पुणे जिल्ह्यातल्या शिरूर तालुक्यातील तीन जणांचा समावेश असल्याची माहिती समोर आली आहे. यात आता आणखी माहिती समोर येत असून मुळ शिरुरचे असलेले कैलास गंगावणे हे आंबेगाव तालुक्यातील निरगुडसर येथील पंडित जवाहरलाल नेहरू विद्यालयात शिक्षक म्हणून कार्यरत होते. मात्र त्याच्या आता काळाने त्यांच्यावर घाला घातला.

या घटनेने संपूर्ण शिरूर आणि आंबेगाव तालुक्यावर शोककळा पसरली आहे. कुणावरही अशी वेळ येऊ नये अशी भावना येथील ग्रामस्थांनी व्यक्त केली आहे. गंगावणे कुटुंबाचे सर्वांशी स्नेहाचे संबंध होते. त्यांच्या जाण्याने
विद्यार्थ्यांमध्ये शोककळा पसरली असून गंगावणे यांच्या मुलीने एमबीबीएस चे शिक्षण घेतले होते. मुलगी डॉक्टर झाली आता मुलाला वकील करण्याचे गंगावणे यांचे ध्येय होते. मुलगा वकील होईलही. मात्र ते पाहण्यासाठी गंगावणे या जगात नसतील याची मोठी खंत आहे.

या घटनेने आंबेगाव तालुक्यातील निरगुडसर गावा सह शिरूर वर शोककळा पसरली आहे. गंगावणे हे शाळेतील सर्व विद्यार्थ्यांचे प्रिय शिक्षक होते. या अपघातात त्यांची पत्नी कांचन गंगावणे ( वय ३८) मुलगी सई गंगावणे ( वय २०) यांचा देखील होरपळून मृत्यू झाला आहे. मात्र मुलाला सोडल्यानंतर आठवण म्हणून त्यांचा मुलास सोबतचा अखेरचा फोटो आता समोर आला आहे.

गंगावणे यांचे बंधू सुरेश गंगावणे हे येथील विद्याधाम प्रशालेत शिक्षक असून त्यांचे दोन्ही भाचे शिक्षक आहेत. चुलत बंधू रुपेश गंगावणे हे शिक्षण मंडळाचे माजी सभापती आहेत. आमच्या कुटुंबावर हा फार मोठा आघात असल्याची प्रतिक्रिया रुपेश यांनी दिली. अपघातातील मृतदेह ओळखण्यासाठी डीएनए टेस्ट करावी लागण्याची शक्यता आहे. गंगावणे यांचे नातेवाईक बुलढाण्याकडे रवाना झाले आहेत.