जुन्नर ( वृत्तसेवा ) : जुन्नर तालुक्यातून एक धक्कादायक घटना समोर आली आहे. व्यवसायिक वर्चस्व आणि बदनामी केल्याचा राग मनात धरून जुन्नर तालुक्यातील प्रतिष्ठित व्यक्तीचा लोखंडी रॉड डोक्यात घालून खून केल्याची घटना समोर आली आहे. पुरावा नष्ट करण्यासाठी मृतदेह पोत्यात भरून विहिरीत फेकून दिल्याचे निष्पन्न झाले आहे. या प्रकरणी पोलिसांनी दोघांना अटक केली आहे. जुन्नर तालुक्यातील बेल्हे येथे घडला आहे.
किशोर तांबे असे खून झालेल्या व्यक्तीचे नाव असून ते बेल्हे विविध कार्यकारी सोसायटीचे संचालक होते. या प्रकरणात पोलिसांनी पांडुरंग जिजाबा तांबे (वय 39 ) व महेश गोरकनाथ कसाळ (वय 30 ) यांना दोघांना पोलिसांनी अटक केली आहे. याबाबत किशोर तांबे हरवल्याची तक्रार चुलत भाऊ संतोष तांबे यांनी आळेफाटा पोलिसात दिली होती.
याबाबत अधिक माहिती अशी की, आरोपींनी किशोर तांबे यांना शेतामध्ये दारू पिण्यासाठी या बहाण्याने शेतात बोलावले. दारू पिताना आरोपी आणि तांबे यांच्या वादावादीस सुरुवात झाली. मुरूम व्यवसायात असलेल्या स्पर्धेमुळे आमची बदनामी करतो का? या गोष्टीचा राग आरोपींच्या मनात घर करून होता. त्यातूनच आरोपी पांडुरंग तांबे यांनी मित्राच्या मदतीने त्यांना लोखंडी रॉडने बेदम मारहाण केली आणि त्यातच तांबे यांचा मृत्यू झाला. त्यानंतर त्यांनी पुरावे गायब करण्यासाठी आरोपींनी तो मृतदेह पोत्यात भरला आणि तो पाण्यावर तरंगू नये म्हणून त्यात दगड भरले. आणि तो मृतदेह विहिरीत फेकून दिला होता.
पोलिसांना याची माहिती मिळताच पोलिसांनी तपासाची चक्रे फिरवत परिसराची कसून तपासणी केल्यानंतर त्यांना मृतदेह जवळ असलेल्या विहिरीत आढळला. या प्रकरणात पोलिसांनी दोघांना अटक केली असून त्यांनीच खून केल्याचे यात समोर आले आहे.